कविता (प्रश्न)

प्रश्न ??

आश्थाको भग्नावशेषबाट
वर्तमानको वैशाखी टेकेर
प्रश्न गर्दैछु...
आमा म को हुँ ?

सिमानाभित्रै भएर पनि 
देश बाहिरको गाँउजस्तैआफ्नै सिमानामा उभिन नपाउँने -हिमाल जस्तै 
आफ्नै टहरामा बल्न नपाउँने जुनकिरी जस्तै 
आफ्नै गुँडमा रुन नपाउने - कोइली जस्तै

आफ्नै पैतालाले उभिन नपाउँने 
आमा म को हूँ ??

बन्धकी राखेको लालपुर्जा जस्तै 
अर्काकै बाकसमा च्यातिनुपर्ने,
गोलघरको धुवाँ जस्तो
नचाहेर पनि छुट्नैपर्ने,
हवाइजहाज र मोटर गाडी जस्तै
कसैले चलाइदिनुपर्ने,
आफ्नै नामलाई - आफ्नो भन्न नपाउने

आमा म को हूँ ?? 

आफ्नो जुनलाई पर्दाले ढाकेर
कसैको लल्टिन बन्नु पर्ने 
अरूको सुरक्षार्थ आफु असुरक्षित हुनु पर्ने
आफैलाई बिक्रिमा राखेर
लिलामीको प्रचार गर्नु पर्ने 
आफ्नै परिचय अरूलाई सोध्नु पर्ने ? 

आमा म को हुँ ?